Kattaqo‘rg‘on Abu Ali ibn Sino nomidagi Jamoat salomatligi texnikumida “Eng yaxshi yosh o‘qituvchi – 2026” ko‘rik-tanlovi o‘tkazildi

2026-yil 10-iyun kuni Kattaqo‘rg‘on Abu Ali ibn Sino nomidagi Jamoat salomatligi texnikumida yosh pedagoglarning kasbiy salohiyati, pedagogik mahorati va ijodiy qobiliyatlarini aniqlash hamda rag‘batlantirish maqsadida “Eng yaxshi yosh o‘qituvchi – 2026” ko‘rik-tanlovi bo‘lib o‘tdi.

Mazkur tanlov ta’lim jarayonida innovatsion yondashuvlarni keng joriy etish, yosh o‘qituvchilarning kasbiy kompetensiyalarini rivojlantirish hamda ilg‘or pedagogik tajribalarni ommalashtirishga xizmat qildi.

Ko‘rik-tanlov to‘rtta shart asosida tashkil etildi. Birinchi shart — “Men tanlagan kasb” mavzusida bo‘lib, unda ishtirokchilarning nutq madaniyati, o‘zini tanishtirish mahorati, ijodkorligi hamda axborot-kommunikatsiya texnologiyalaridan foydalanish ko‘nikmalari baholandi.

Ikkinchi shart ochiq dars mashg‘ulotlari asosida o‘tkazilib, darsning maqsadga yo‘naltirilganligi, pedagogik mahorat, interfaol metodlardan foydalanish darajasi, o‘quvchilar bilan ishlash sifati, vaqt taqsimoti va dars samaradorligi mezonlari asosida baholash ishlari olib borildi.

Uchinchi shartda pedagogik vaziyatlarga yechim topish bo‘yicha ishtirokchilarning kasbiy tayyorgarligi sinovdan o‘tkazildi. To‘rtinchi shart — ijodiy chiqish orqali pedagoglarning ijodiy salohiyati va tashabbuskorligi namoyon etildi.

Tanlov yakunlariga ko‘ra:

🥇 I o‘rin — S. Bozorova

🥈 II o‘rin — D. Beknazarova

🥉 III o‘rin — M. Omonova

Shuningdek, quyidagi nominatsiyalar bo‘yicha g‘oliblar aniqlandi:

• “Eng innovatsion pedagog” — D. Eshpulatova

• “Eng faol yosh o‘qituvchi” — Sh. Ismoilova

• “Eng yaxshi ochiq dars” — A. Davronova

• “Eng yaxshi taqdimot” — M. Xoldorova

• “Yilning ijodkor pedagogi” — I. Najimova

Tadbir yakunida g‘olib va faol ishtirokchilar diplom hamda esdalik sovg‘alari bilan taqdirlandi.

Ushbu ko‘rik-tanlov yosh pedagoglarning kasbiy mahoratini oshirish, zamonaviy ta’lim texnologiyalarini amaliyotga tatbiq etish hamda ta’lim sifatini yanada yuksaltirishga qaratilgan muhim tadbirlardan biri sifatida e’tirof etildi.